عبق ازهار الحرية في حيّنا

 في شجرة أكيدينيا مقابيل شباك غرفة من غرف الدار

كل سنة متل هالوقت بشهر آدار بكون برد و زلازل وامطار..

و الشجرة بتبلش تبرعم، وهيك نابيل ما يخلص الشهر بتصير كلها ازهار

قبل سنة متل هالوقت و انا عم ادرس جنب الشباك ..

اسمعت اصوات كلها عزم و ثبات و اصرار ..بتفوت عالقلب قبل الدان

طلعو العالم والناس بكل الاعمار طالعة بميات الآلاف عم تهتف للحرية و لدرعا الفداء ..

يا الله هاليوم كنت ناطرتو من زمان !!

ما صدقت اللي سمعته و ناديت لكل العيله و وقفنا عالشباك ..

نسمع صوت الحرية اللي يقرب علينا نحن وكل الجيران ..

و بعد ساعة من هالزمان بلشت زخات الرصاص بكل مكان ..

و صوت الحرية تلاشى وتخبى و توارى عن الانظار ..

و بقي بالساحة ورود ما عد الها عالارض مكان ..

و صار مكانها الجنة دار مافيها غير السلام .. و الشجرة اللي قدام الشباك ..

ريحتها الطيبة كانت اطيب من اي (برفان) و فاحت بكل مكان ..

و عبّت البيت و الشارع و الميدان .. لحد حسينا بالدوخة كمان .. و ضلت معنا ايام و ايام ..

لحتى صار صيف و الشجرة صارت كلها اوراق بدال الزهرات ..

واجى بعدها الخريف و ورقة بعد ورقة تقريبا هرت كل الاوراق ..

و الشجرة صارت ما بتلفت الانظار لا بالريحة ولا بالزهرات ..

وبعد ما مر سنة من هالزمان .. و رجع طل علينا آدار ، عم فكر .. رح نرجع نشم هالريحة و لا لأ مارح تنعاد ؟

من دفتر مذكراتي .. أول يوم طلعت فيه مدينة اللادئية .. مشروع صليبة .. وهي الصورة هي صورة الشجرة اللي حكيت عنها