- اي شو يعني مين قال انو الثورات الها والدين واذا الها تفضل قلي مين أبو الثورة الفرنسية … لايكون ابو شنكليش وماني دريان !!!
- الجيش الحر مانو منيح …
- اي شو يعني ما الكل بيعرف انو القتل ما بيجيب غير قتل والجيش الحر اضطررنا لوجودو ولازم ندعمو مزالو انوجد وهلئ هو اقوى طرف بالثورة ( هيك بيقولو ) !
- السلمية احسن شي …
- بالله شو مين حكالك هالحكي مانك عم تشوف الناس الي انقتلت وصدورها عارية …. يعني بدك يصير الدم للصّرة مشان تعرف ضرورة الجيش الحر يحميني الله يحمي !!
- المجلس الوطني معفن …
- لا ولو بالله عليك …. ما هو الممثل الشرعي للشارع الي العالم اختارتو وكل أعضاؤو من أشوس ( هي جاي من كلمة أشاوس ) المعارضين بالخارج !!
- الهيئة خاينة …
- لا ولو حاجتك بقا مسخرة يعني اذا حكى واحد عن العروبة والوطنية ورفض التدخل الخارجي العسكري صار خاين !!!
- حلب مانا عم تطلع ….
- مشااااان الله سكوت يا زلمي روح شوف جامعة حلب جامعة الثورة و ريف حلب كلو ثائر ولا مانو مملي عينك بدك ثورة مليارية يعني !!
- الشوام نعانيع بيطلعو جنازة شهيد مظاهرة وبينامو شهر ….
- سكوت مشان ربك سكووت روح شوف الميدان وداريا لك المظاهرت وصلت للمزة وجنب القصر الرئاسي ولسى بتقلي نعانيع !!!
- حمص عاصمة الثورة …
- اي ماشي ما اختلفنا بس شو رأيك تسيطر حمص عالثورة يعني واذا حمص نامت تموت الثورة !!!
- طيب ما كنا عايشين ومافي أحلى مننا ليش هالثورة يعني …
- ولله مو بس نحن الي كنا عايشين كمان الزنوج كانو عايشين والهنود الحمر والمصريين والتوانسة هلئ وقفت على تعباية بطنك بكم لقمة أكل وتقول انك عايش … يا حبيبي على هيك تفكير !!!!
- طيب الغرب مانو معنا …
- اها اها ليش ايمت كانو معنا حبيبي … او لا لا مين قلك انو بدنا ياهن يكونو معنا !!!
- طيب عم يقولو انو عم تجي مصاري من جهات مشبوهة …
- اي شو يعني هلئ المصاري لازم تقرا عليها الفاتحة لتكون طاهرة يعني … الدعم موجود اي ومن كتير أطراف !!!
- طيب ليش عم تركضو ورا مجلس الامن .. هي الجمعية العامة اخدت قرار مشانكن ليش ما انبسطتو وكنيتو شوي …
- اي بس للمعلوماتية يعني الجمعية العامة آخدة قرار مشان فلسطين من السبعينات وما استفدنا شي .. يعني متل الض*** عالبلاط !!
- اي ولله حيرتني يعني كل ما بسألك سؤال بتجاوبني بتساؤل …
- اهااااااااا هلئ انت عيني
- ليك لقلك شغلة عمي … نحن هيك طول عمرنا هيك ما رح نتغير
- فينا عرق التنظير وفينا عرق المثالية وفينا عرق الوطاوة وفينا نرجسية رأي وفينا سخافة وفينا دهاء وفينا عرق مهم هو المسخرة على غيرنا و منحب المهاترات وبدنا نعمل اقصى جهدنا لنثبت اننا على صح والكل غلطان يا عمي انا افهم واحد بالعالم والكل مانو عم يفهم علي لانن اقل ذكاءاً مني وهاد شي بعرفو انا منيح كتير
- مممممم
- العمى صحي كنو صحي …. هلئ نحن هيك صحي ولاّ أنا نايم بالخسة !!!!
هلئ السؤال هو كالتالي …. كم واحد مننا عامل ثورة قبل هي الثورة مشان يجي يعطيني نصايح و ينظّر على طيـ**
انا من ناحيتي ولا مرة وبلا كزب ولا واحد منكن عامل ثورة قبل هلئ …..
مشان هيك حبيباتي الثورة اي فيها كتير عيوب وأخطاء وضعفت ايام كتير وايام كانت قوية ومع كل هيك رح تنتصر بإذن الله
بمجلس او بهيئة …. سلمية او مسلحة …
بتدخل او بدون تدخل … انا هيك حاسس .. أنو رح تنتصر
إلك معي شي عمي انا حاسس انو رح ننتصر !!
عاشت سوريا حرة أبية
ليست هناك تعليقات:
إرسال تعليق