انا الي صفحة قديمة بالفايس بوك و بكتب فيها …. بس هي اول مرة بجرب اكتب المندسة … و بتمنى تقبلوني اخت الكن و ضيفة .. انا بتابعكن من زمان ..
هاد تحليل بقلمي عن وضعنا …. بكل تواضع … هاد بعبر عن رأيي الشخصي … و انا هيك بشوف … يا ريت تناقشوني فيه … و الي ما بوافق عليه على عيني … اختلاف الأراء مو مشكلة:
———————————
الثورة مضي عليها تقريبا سنة … النظام سقط من اول طلقة رصاص ضربها يوم 18 اذار بدرعا … كلنا … سواء اظهرنا هالقناعة علنا … او انكرناها و امنا فيها داخلا … متفقين على هالحقيقة …. الكل … غالبية شعبنا الثائرة … الدول العربية … الغرب … اسرائيل … ايران روسيا الصين …. و حتى النظام بذات نفسه .. الحقيقة متسربة لتفكيره …
القصة مو قصة معنويات و زت كلام …. القصة قصة واقع على الأرض … كل الحواجز انكسرت … كل الأصنام تحطمت …. الناس صارت تسب النظام بقلب حلب بين بعضا على ادنى درجة ثقة دون اي مشاكل … النظام انتهى و احترق من فترة كتير طويلة …. و البرهان الأخير كان بابا عمرو … الي هي حي من احياء مدينة … ضل بحرب حقيقية عليها 27 يوم لحتى دخلها و بعد انسحاب خصمه و ليس بكسره … و ما قدر يمسك رمز من رموز الثورة الكانو موجودين …
اذا فكرة بقاء النظام مو واردة باي شكل و نسبتها صفر بالمية …. و هالأمر منتهين منه و ورا ضهورنا ..
اشو الوضع لكان ؟؟ …… بكل بساطة …. الغرب و بناء على تفكير اسرائيلي … مطبق القاعدة التالية ….. اتركووووهن …. خلي يدمرو بعض هالطرفين …. الشعب السوري من طرف …. النظام و ازلامه من طرف …. خلي يفنو بعض عالأخير …. استخدمو اوراق رابحة ضد الطرفين … اضغطو عالنظام من هون …. اضغطو عالشعب من هون … لحتى تخور قواهن نهائيا …. و لكن .. هنن بيعرفو بالأخير بالأخير … رح تميل كفة الشعب … و النظام عبيتئاكل …. و بكل بساطة … نحنا ( كمجتمع دولي ) …. بس شفنا كفة الشعب مالت بقوة … و صار في خطر اني يسقط النظام ذاتيا …. منقفز بكل بساطة عالواجهة و منقول … بكفي … هاد نظام مجرم … لازم الكل يتدخل و يحمي هالشعب المسكين … و يجب ازالة هالنظام …. و رح يحاولو يفرضو سيناريو بخصن هنن لنهاية النظام …
انا بالنسبة الي …. الكل بدون استثناء اي حدا … اي حدا بالمطلق …. هنن ضد الشعب السوري و مالن مع مصلحتو …. حتى قطر و السعودية و من لف لفهم …. الهن اجندة و دور معين … و ثورة شعبنا هي الي فرضت عليهن الوقوف لجانبه لاسباب عديدة اولها ايمانن باني النظام رح يسقط بدعمن او بغيرو حتى لو طالت المدة و هنن مالن مستعدين يكسبو نظام مجرم لشوية وقت و يخسرو شعب رح يعيش ….
احدى اساليب هالقصص …. هي الإعلام … و بالاخص الجزيرة و العربية … و بالأخص الجزيرة …. انا ما بنكر باي شكل … اني الجزيرة الها دور كبير و هائل في خدمة الثورة و نقل الحقيقة …. و اني تغطيتها فضحت النظام بشكل كتير كبير …. بس انا بدي قول …. اني هالتغطية هي بحد ذاتا … ممنهجة …. يعني محطوطة بقالب سياسي …. يعني بيتم تسييرها بحيث تروح الأحداث للهدف الفلاني … مو للهدف العلاني … شلون يعني ؟؟؟ …. الي متابع الثورة من لحظة الصفر …. بيتذكر اني الجزيرة باول شهر …. كانت تغطيتها اول كم اسبوع شبه معدومة للأحداث … لحد اني بتذكر على صفحة الثورة نفسها …. ناس تخون الجزيرة و تقول ويييييييين !! مو انتو الضمير العربي و طول الوقت واقفين مع الشعوب ؟؟ لعاد سكتتو لما صار شي بسوريا …. بيومها قطر عطت النظام شوية وقت قصير بلكي بيخلص الموضوع بحنكة و كان فعلا ممكن يخلص … بس النظام حمار و كلكن بتعرفو هالشي … و لما قطر وصلت لقناعة من اني الامور بلشت تكبر …. بلشت تغطي الأحداث ببساطة حفظا لمصداقيتها و مشان ما تصير برا اللعبة مع تقادم الأحداث … و هداك الوقت النظام و زبانيته بلشو هجوم عليها و كان ما كان …
حاليا … نفس القصة تماما عبتقوم فيها الجزيرة بس بشكل اخطر …. حلب …. اهم محافظة بسوريا …. الثقل الإقتصادي لسوريا …. عصب الدولة …. المحافظة الي ثورتها الشاملة ببتسقط النظام عن بكرة ابيه …. هالمحافظة بتم التعتيم عليها اعلاميا بشكل هائل …. بشكل ممنهج و مدروس و خبيث فوق ما يتم تصوره ….
انا عبتابع من فترة كتير طويلة …. الجزيرة محيدة حلب عن ساحة الثورة على عظم ما فيها …..الامثلة كتييييييييييرة بشكل لا يعد عن هالموضوع … رح احكي كم مثال و ببلش من اليوم ….. اليوم حلب و هي كمدينة الها اسمها الرنان و ثقلها في اهمية اسقاط النظام اعلى من العاصمة نفسها …. طلعت فيها المظاهرات بشكل كبير …. الاف مؤلفة باحياء كتيرة و كلها من المدينة نفسها و سقط شهداء و مواجهات مع الأمن و كل مظاهر الثورة بالكامل …. الجزيرة مرت عالأمر مرور الكرام و لا كاني شي عادي … بتقرير من التقارير .. عبيحكو عن الشام …. طالعة مظاهرات ب 3 اماكن مثلا … القابون و القدم و الميدان …. كل واحد من هالأحياء … تخصصلو فترة كلامية مع اني مثلا بالقابون طالعة مظاهرة شبه طيارة كون اني الحي محتل من فترة طويلة …. بحلب … طالعة بالسكري بالفردوس بالصاخور على سبيل المثال لا الحصر … مظاهرات عارمة بتوحي كأنك في حمص و تحدي منقطع النظير للنظام و الأمن في ذروة المظاهرة مو قدران يقرب …. دمجتها الجزيرة كلها في كم جملة سريعة اني طلعو بكذا و كذا و كذا و ربي يسر ….. و خلص الحديث عن حلب …. هيك بس هيك !!!! كل هللي صار بحلب اليوم و بس هيك !!! اي الله يعطيكن العافية فضلتو على راسنا …
صحيح هنن بطالعو مثلا بنشرة الضهر مراسل و بحكو مو عن اخبار المدينة …. بس باينة الرغبة في تجنب الحديث عنها من خلال عدم ذكر اخبار حلب الا باخر نشرة باليوم و بكلمتين موجزات و هي قمة المهزلة …. حلب مدينة كبيرة فيها ملايين السوريين … و ما بدخل منن نت و بشوف مقاطع الفيديو الا ما رحم ربي …. شلون رح تدرى العالم بمقدار انكسار النظام بحلب اذا ما ورد الشي اعلاميا عالتلفزيون … و هكذا تسير الأمور …. نفس الشي بالنسبة للريف الحلبي … الاتارب مثلا هي مدينة متل حلفايا او الرستن او بنش و هكذا … تم اجتياحا من قبل الجيش و بعد 10 ايام كاملة حتى حكت الجزيرة عنها !!!! مع اني ما كان في شي مماثل اعلاميا الا ب بابا عمرو … معقول !!! معقول احكي عن اعتقالات بقدسيا بخبر مفرد و اترك اجتياح مدينة بمحافظة متل حلب ( على اهمية الخبرين ) .. !! … نفس الشي الي صار باعزاز و عندان وووو …..
كل هالحكي بيصب اخيرا في السياسة الي بلشت فيها كلامي … تطويييييييل الزمن …. انهاك الشعب … و جزء منه تأخير الثورة المحتمة لحلب …. من خلال تحييدها و تجاهلها اعلاميا … انتو بتعرفو اني لو تم وضع حلب في قلب الهم الإعلامي للقنوات الإخبارية و لمدة شهر متواصل … لتنفجر المدينة بالكامل و بدون ادنى شك ….
هلأ الحمدلله … اني هنن هيك بخططو … و هنن هيك بريدو …. بس ارادة رب العالمين فوق كل ارادة …. و الحمدلله اني ثورة حلب عبتتسارع و تكبر بعكس ما هنن رايدين و هاد كلو بفضل الله …. نحنا الي علينا اني نعتمد على الدوام على الله و نكون بشكل متواصل ايد وحدة و على هدف واحد ….. و انشالله رح نحقق حلمنا بسوريا رائعة على غير ما بريد هالنظام المجرم او اي حدا تاني …. و هاد اليوم جاي باذن الله … و ما ذلك على الله بعزيز 
ليست هناك تعليقات:
إرسال تعليق