حرية يا نااااس



انت ليش عم تتظاهر … ؟؟
في ناس صارت تتظاهر هلئ للتباهي
وناس عم تتظاهر مشان تشم هوا
وناس عم تتظاهر مشان تشوف رفقاتها
وناس عم تتظاهر مشان قضية وطن
وناس عم تتظاهر مشان تفش خلقها

وناس عم تتظاهر حباً بالتظاهر لان عنجد شي حلو
وناس عم تتظاهر رياء ** يعني مشان بكرا ما يقولو علي رفقاتو هاد ما كان يتظاهر **

بس انت ليش عم تتظاهر هيك طائفي يعني
انت كـ سني ليش عم تتظاهر وبدك سوريا دولة اسلامية مع أنو ما كل السنة بدن هيك
انت كـ علوي ليش عم تتظاهر وانت عم تقول أنو مانك شبيح .. ليش خايف من بكرا … ليش ما بتخاف على بكرا
انت كـ كوردي ليش هدفك الاول من التظاهر هو حقوقك و بعدين غيرك
انت كـ مسيحي ليش عم تتظاهر وتطالب بعدم تحييدك مع أنو انت الي عم تحيد حالك
انت كـ درزي و اسماعيلي ومرشدي ليش همك الاول طائفتك وبعدين غيرك

ليش كل ما حدا حكا كلمة طائفية صارت الشغلة عادي يعني وكأنو كلمة صارت عادية جداً متل المرحبا
نحن ما كنا هيك ولا حنصير هيك
طائفتي هي شي خاص فيني لحالي وانا أدعو الكل من يوم ورايح بالاحتفاظ بهالشغلة لنفسو وبس
لا تجهر بطائفتك عالطالعة والنازلة وئدام مين ما كان ولا تفكر أنو هي حرية …. لا عمي هي مو حرية
ووقت بيسألك حدا عن طائفتك لاقي مهرب من الجواب .. وهي شغلة بسيطة
واذا ما اطمنلك عريف انو ما بدك يا لهاد الزلمي لان ما رح يفيدك ولا يفيد غيرك ..
الي بدو يحكي طائفية من هلئ يحسب حسابو مالو مكان بسوريا المستقبل
الي بدو يتظاهر يتظاهر لسبب واحد وهو الاهم اولاً وأخيراً … الحرية
وقت تنادي بالحرية تأكد رح تحصل عليها
ووقت بتتظاهر لهدف شخصي فيك لا أنت رح توصل لهدفك ولا رح تساعد غيرك بالوصول لهدفو

هدفنا من أول الثورة هو الحرية ثم الحرية ثم الحرية
الحرية لا طائفة لها الحرية حق للكل ورح تجي للكل

الطائفية طاعون … المصلحة شي موقت … الرياء آخرتو بدو ينكشف حاول قد ما فيك تحيد مصلحتك … عميل خير وكب بالبحر يا أخي لا تقول في ناس ما بتستاهل … الكل بيستاهل والكل عانى مع تفاوت درجة المعاناة

الثورة للكل … مو إلك
الثورة مو مشان زيادة رواتب
الثورة مو مشان يصير عندك شاليه بالرمال

الثورة شاملة كل شي …. لانا اسلامية ولانا ضد العلوية ولانا مسلحة ولانا سلمية
الثورة السورية هي ثورة العصر الجديد لا تخرب صورة كبيرة برتوشات سخيفة

ثورتي لسوريتي

وعاشت سوريا حرة أبية