حابب أعتذر منكون بالأول….أنتخبت اليوم…قصدي أبديت رأي بالدستور …. مجبور أخوكن تمنى لو كان بطل…بس أنا موظف متلي متل كتير من الموظفين يلي أجوا الصبح على دوامون ليشوفوا انوا أتحول لمركز أقتراع… هلق عرفت ليش ساوى الأقتراع نهار أحد …تاري ساولنا سبرايز….. هلق يلي لفتلي نظري هو أنوا يلي أقترع بس سجل هويتوا بيدون مايعلمولوا أصبعوا بالحبر متل أنتخابات المجالس…. غريبة كنوا أقتراع الدستور أقل أهمية من اقتراع المجالس …..أو يمكن مشان الواحد يعبر عن راي أكتر من مرة أذا ماعجبوا رأي الأول .
قلي واحد من رفقاتي أنوا رح يقارنوا الوائح الأسمية مع بعض….. هلق بغض أنوا الوائح كانت كتابية مو شغل تكنلوجية… كمبيوتر يعني , مابعرف قديش فرصتون ليلاقوا أسم واحد تكرر مرتين بين مليون واحد أنتحب….. بس هيك يمكن أحسن لتعزيز الديموقراطية يعني…..
في مقولة سمعتها من زمان … قال بزمن السلم الولاد بيدفنوا أهليون و بزمن الحرب الأهل بتدفن ولادها….. صري فترة بشوف أهالي عم تدفون ولادها….بالدنيا أو بالأورنيت…… نفس المشاهد جنازات … وأمهات عم تبكي…..من فترة مو بعيدة واحد من رفقاتي .. رفقاتي البعاد مو كتير قريب مني يعني فيكزن تقولوا معرفة المهم أنوا أستشهد أو مات متل مابدكون… كان صروا أسبوع متجوز.. كان عمروا تمان وعشرون ملازم أول بالجيش…بعد أجازة أطرارية أخدها مشان العرس…… أستدعوا مشان يرجع عل القطعة …. أجى تكليفوا بحمص… بعد أسبوع أتصلوا بأموا مشان نجي تاخدوا…. ابو متوفي وهو أكبر أخواتوا ….يمكن في منكون مفركين أنوا هي قصة عم بألفها بس كل كلمة حكيتها صارت…. بغض النظر صدقت ولا لا.
الحمد الله أنوا ماني عسكري ….صري ست سنيين خالص خدمة…..وقت بفكر برفقاتي يلي بالجيش .. عنجد بحمد ربي كتير لأني ماني بمحلهون…شو الخيارات يلي قدامهون….. أذا نشق العسكري رح يحط حالوا هو وأهلوا بخطر الموت … أذا مالتحق أو تخلف أو مانفذ الأمور رح يعتبر عدم تنفيذ أوامر عسكرية ممكن توصلوا للموت…. واذا نفذ رح يكون بوضع ياقاتل ياماقتول أذا واجه حدا من المنشقيين يلي ممكن يكون واحد من رفقاتوا……
مابعرف شو بتحسوا لما بتشوفوا جنازات عسكرين على الدنيا أو لما بتسمعوا بضابط مات أو عسكري….. أنا أكيد مابنبسط لأن كمان يلي مات عندوا أهل…….الجيش عم يتفكك…… يمكن كتير بيفكر أنوا هيك أحسن لأنوا جيش الأسد…..المشكلة مو بالجيش يلي مكون من عساكر أو ضباط صغار المشكلة بالقيادات العليا هي يلي يمكن قتلها ممكن يوفر كتيير من الناس….وهادا يلي صعب يصير….
شفت اليوم بشار عالتلفزيون عم يقترع ومعوا أسماء فاتوا على التصويت …. كنوا ماعندوا ثقة بمرتوا تصوت لحالها…. احلى شي لما طلعوا وساوا معون مقابلة……. نظرة الفخر يلي بعيون أسماء وهي عم بتطلع بجوزها البطل…… حسيتها مانها مصدقة حالها أوا جوزها رئيس….. أحياناً بحس هل المرأة معتوهة….. قال معها الجنسية البريطانية…… وتربت ببريطانية…….. مع هيك شكلها أنوا ماعندها مشاعر…… قال أصلها حمصي كمان….
أكتر شي بيضحكني بهالأيام السودا ….هنن المحللولين السياسيين السوريين متل مابتسميون الوالدة……تمنيت شي يوم جاوب على سؤال ……. دائماً بيلفوا وبيدورا بيدون ما يجاوبوا…….وبعد كل سؤال بيجاوبا….. أعطيني فرصة لرد….. جاوب أول بعدين رد….. اليوم كانت مقابلة مع ضرار جمو.. تبع رئيس الرابطة تبع المغتربين العرب…….كل ما بيقوا منصبوا بضحك….. بتضل المذيعة شي خمس دقايق لتقول منصبوا….. كتير بتجيين أفكار أنوا هي الرابط هو أسسها وهو رئيسها وهو أعضائها….. حابب أسئل المغتربين العرب حدا فيكون أنتخبوا ليكون رئيس هي الرابطة وفيكون تقللولي شو شغلتها هالرابطة….
ليست هناك تعليقات:
إرسال تعليق